Приватност

Кој е одговорен

За податоците на оваа страница е одговорен cenaimbox. За секое прашање за приватноста пиши ни на kontakt@cenaimbox.mk.

Посети и пребарувања

За да знаеме кои производи се барани и да ја подобруваме страницата, бележиме кои страници на производи и модели се отвораат, што се пребарува (текстот и филтрите), кои предлози од пребарувањето се избираат и кои линкови кон продавници се кликаат. Со секој запис чуваме дали е телефон, таблет или компјутер, и името на сајтот од кој дојде, ако дојде од друг сајт. Ова го правиме затоа што ни треба за да ја водиме страницата (легитимен интерес).

IP-адресата не ја чуваме. Посетителите ги броиме со ознака што ја пресметуваме од IP-адресата и прелистувачот и што се менува на секој прв во месецот. Со неа знаеме колку луѓе се враќаат во текот на месецот, но не можеме да те препознаеме од еден месец во друг, ниту да дознаеме кој си.

Поединечните записи ги бришеме по 90 дена. Потоа остануваат само дневни збирови по производ и по пребарување, без ознака за посетителот.

Со истата ознака ограничуваме премногу барања од еден посетител. Тие бројачи ги бришеме по еден ден.

Статистика

Бројот на посети, страниците, од каде доаѓаат посетителите, прелистувачот, оперативниот систем, уредот, големината на екранот, јазикот, и државата и градот проценети од IP-адресата ги мериме со Umami. Umami работи на наш сервер, без колачиња, и не ја чува IP-адресата.

Со Umami мериме и колку брзо се вчитуваат страниците кај посетителите, за да знаеме кога страницата е бавна.

Следење цени

Ако следиш цена, ја чуваме твојата е-пошта, производите што ги следиш, бројот и условите што си ги избрал (пад на цената, цена под некој износ, повторно на залиха). Ги користиме само за известувањата и за мејловите за потврда и обновување. Ова го правиме со твоја согласност, која ја повлекуваш кога ќе се отпишеш.

Следењето почнува дури кога ќе го потврдиш со линкот од мејлот. Непотврдено следење го бришеме по 7 дена. Потврденото трае 6 месеци, а 7 дена пред крајот ти пишуваме за да го обновиш.

Секој мејл има линк за отпишување со еден клик, а на страницата за твоите следења можеш да ги смениш или избришеш. 30 дена по отпишувањето ја бришеме адресата и чуваме само нејзин еднонасочен отпечаток (hash), за да не ти пишеме повторно. Записите за пратените мејлови ги бришеме по 90 дена.

Кога ќе ја отвориш страницата за твоите следења, прелистувачот го памети нејзиниот клуч (localStorage), за да не мора да го бараш мејлот. Го бришеш кога ќе ги избришеш податоците на страницата во прелистувачот.

Кој друг ги гледа податоците

Мејловите ги праќа Brevo, од Франција. Brevo ја добива твојата адреса и содржината на мејлот, може да бележи дали мејлот е отворен, и ни кажува дали е доставен, одбиен, означен како спам, или дали си се отпишал преку него.

Страницата работи преку Cloudflare, од САД, кој ги пренесува сите барања до нашиот сервер и ја штити страницата од напади, па ја гледа и твојата IP-адреса. Пред пријава за следење, проверката Cloudflare Turnstile потврдува дека не си робот. Cloudflare ги прима и мејловите што ни ги праќаш на нашите адреси, и ни ги препраќа.

Кога нешто ќе тргне наопаку, технички извештај за грешката (адресата на страницата и описот на грешката, без твојата IP-адреса) оди до Sentry.

Серверите и базата на податоци се кај Hetzner, во Европската унија. Зачуваните страници на продавниците, фотографиите на производите и неделните резервни копии на базата, во кои се и адресите за следење цени, се чуваат кај Backblaze, исто така во Европската унија.

Кога ќе кликнеш кон продавница, продавницата гледа дека доаѓаш од cenaimbox, и понатаму важат нејзините правила за приватност. Податоците не ги продаваме и не ги даваме никому.

Твоите права

Можеш да побараш да ги видиш, поправиш или избришеш податоците за тебе, или да се спротивставиш на нивната обработка: пиши ни на kontakt@cenaimbox.mk. Записите за посетите не се врзани за име или адреса, па по нив не можеме да најдеме некого. Ако мислиш дека не ги почитуваме правилата, можеш да поднесеш претставка до Агенцијата за заштита на личните податоци (azlp.mk).